Prachtig Oranjekonsert

Een volle sporthal De Steense in Wolvege het gisteraovend geneuten van een prachtig Oranjekonsert en daor weren Fettje en ik getuge van. Burgemeester André van de Nadort eupende de aovend nao et Wilhelmus dat uut volle bost mitzongen wodde. Et pergramme wodde prissenteerd deur Paul Passchier, zeune van Dick Passchier die vroeger et tillevisieverslag dee van et defilé op Peleis Soestdiek. Dirigent van Euphonia was nog veur ien keer John Blanken. In mien tied bi’j Euphonia he’k altied mit him saemenwarkt. De meziek was mooi en et zingen van Syb van der Ploeg ok. Veur et schoft hadde hi’j een oranje jassien an, nao et schoft wat donkerders. Hi’j zong zowel veur as nao et schoft een stok of vier lieties in et Engels, Nederlaans en Fries. Netuurlik In nije dei, mar ok Gabriella’s Song uut de beroemde en ontroerende film As it is in heaven in een Friese vertaeling. En dan Het Dorp dat Wim Sonneveld zo bekend maekt het. Et mooie was dat tiedens dit lietien alderhaande foto’s van et oolde Wolvege te zien weren. Nao et konsert weren d’r lekkere happies en draankies, dat et was al haost middernaacht doe Fettje me thuus weer ofzette.