Johan Veenstra
Stellingwarver schriever en verteller

Prachtig boek

Plaetst op 9 juli 2023.

Ondaanks et waarme weer he’k vandaege een lekkere fietstocht van 57 kilemeter maekt. Dat is percies lieke vule kilemeters as da’k gister verreden hebbe. Ik bin bi’j de Lende langes naor de Driewegsluus fietst. Now ja, een pat van et Lendepattien was ofsleuten. Tussen Wolvege en de Sas. Ik bin doe even zudeliker over de Nieksweg naor de Sas gaon. Van de Driewegsluus bin ‘k naor de Scheenesluus fietst. Daor he’k in de theetuun bi’j meule De Rietvink wat drinken en een panini mit tonijn had. Van daor bin ‘k deur de Braandemeer en over et fietspad bi’j de Kuunder langes naor Mildam fietst. En doe deur de Mildamster Poolder en bi’j de Scheene langes weer naor huus. Krek as gister wa’k nat van ’t zwiet. Doe ‘k thuus was, zag ik dat ik een prachtige mail kregen hadde van een man uut Berkoop die mien ni’je boek tiedens zien vekaansie in Frankriek lezen hadde. Hi’j hadde d’r daor uut veurlezen veur vrunden uut Drenthe en BelgiĆ«. Dit mailde hi’j: Wat hej’ een prachtig boek mit verhaelen schreven. Ik bin slim onder de indrok. De meniere waorop ie joen warkelikhied mengd hebben mit jow fantesie is geweldig. Hiel eerlik, mankeliek en ontroerend. Ik wor kienderlik bliede van zokke mailties. En now begint et hier trouwens mal weer te wodden… Hieronder een foto die ‘k vandemiddag maekt hebbe. An et nuunderpad naor meule De Rietvink staot nog een mooie meule die as vekaansiehuus bruukt wodt. Dat daenk ik temeensen.