Postzegels

Ik hebbe intied et 25ste verhael naor Geertje en Jelle stuurd en ze hebben me de tiedinge daon dat ok dit verhael in heur ogen wel geschikt is om in een boek mit wat langere verhaelen op te nemen. Dat is nog lange niet zoveer, mar toch… Ze kriegen now nog twie verhaelen van me om die es te bekieken. Dit 25ste verhael het as titel Postzegels en et telt 1962 woorden. Alle verhaelen in disse serie zitten om de twieduzend woorden henne. In dit verhael gaot een man ien keer in de maond mit de trein naor de postzegelmark in Amsterdam, mar gaot hi’j daor ok echt henne?

Vandemiddag he’k even op ‘e fiets naor Wolvege west om acht potten hunning op te haelen bi’j mien aachterneve en iemker Piet. D’r gaot hier hiel wat hunning deurhenne. Ik doe et in de thee en bruke et a’k ontbijtkoeken bakke. Ik hebbe ok nog even naor de supermark west en now he’k dan eindelik vier volplakte speerkaorten inwisseld. Dit was de vierde keer da’k ze bi’j me hadde. De drie veurige keren he’k ze iedere keer in de auto of de fietstasse liggen of zitten laoten. Ik bin bi’jtieden ok zo dom! Bi’j de Poiesz hej’ nog gewone speerkaorten daor aj’ zegelties op plakken kunnen. Dat vien ik mooi! Lekker oolderwets zegelties plakken! Niks gien medern gedoe!