Post

Et is in wezen nog altied lekker fietsweer. Et is wel slimme spietig dat de zunne d’r niet bi’j is, aanders was et hielemaole geweldig fietsweer west. Ik hebbe vandemiddag een klein tochien van 23 kilemeter maekt. Bi’j de Lende langes naor Wolvege, daor he’k de fietstassen vol bosschoppen stopt, en doe bin ‘k weer naor huus gaon. Ik kreeg vandemorgen ok nog een kaorte van Harry en Frans nao vuuf vekaansieweken in Frankriek. Harry schrift dat hi’j daenkt da’k de kaorte eerst kriege as zi’j al weer thuus binnen. Mar dat kan haost niet. Ze hebben gisteraovend om 22.11 ure nog in mien internetdagboek keken in de Pyrenenen. Dat kan ik zien. En vandemorgen  kreeg ik de kaorte. Dan hadden ze vandemorgen dus thuus in Noordwoolde wezen moeten. Mar dat kan allienig as ze vannaacht allebeide omstebeurten as gekken deur et duustere Frankriek en België scheurd hebben. Of ze bin mit een privé vliegtugien vandemorgen betied op Eelde laanded. Beide liekt me twiefelachtig. Ik daenke gewoon dat de Fraanse en Nederlaanse post hatstikke vlogge warkt hebben.