Portugesies

Et is wat mit die laeste kollum van me in de Liwwadder Kraante… Gisteraovend kwam d’r een hiele lieve mail van een vrouw uut Holwerd en die begon zo: Wat sil ik dyn stikjes misse yn de LC. Ik was stomverbaosd, want ik hole daor hielemaole niet mit op! Ik daenke da’k wel begriepe waor de verwarring lichtkaans wegkomt. In die bewuste kollum staot de zin: Ik hebbe verlangst naor een zanger die zingt  dat de tied ondaanks alles veraandert en beter wodden zal. De vrouw uut Holwerd schreef in heur mail The times they are a changin. Juust ja, dat lietien van Bob Dylan doelde ik op. Mar mit die veraanderende tied bedoelde ik de tied nao corona. Dat dan alles weer beter wodden zal. Niet dat de tied veur mi’j veraandert omda’k stoppen gao mit mien stokkies in de kraante. Ik hebbe heur een mail weerommestuurd mit de tiedinge da’k gewoon deurschrieve in de kraante. Dat now he’k heur grif bliede maekt! En deur dit dagboekstokkien misschien wel meer meensken die ok docht hebben da’k stoppen zol. Mar lichtkaans bin d’r ok wel meensken die juust graeg willen da’k d’r wel es een keer mit stoppe. Dat volk moet dan nog even geduld hebben!

Vandemorgen he’k Cees op vesite had. Hi’j nam een bakkien mit tietelrosies veur me mit, dat hadde vanzels niet hoefd. Hi’j het hier wat drinken had en ik hadde een peer lekkere koeken van de waarme bakker uut Wolvege. Nee, gien gebakkies meer… We hebben een peer uurties genoeglik praot over zien en mien schrieveri’je.

Een peer weken leden kree’k van Anke as kastkedo alderhaande spul daj’ neudig hebben veur et bakken van Portugesies. Ik hebbe dat doe vanzels drekt perbeerd en dat is een faliekaante mislokking wodden. Et spul kwam zwat verbraand uut de ovend. Een mal spul. Ik hadde de boel niet goed ofsteld, koekebakker da’k bin. Vandemiddag he’k me dus een herkaansing geven en… d’r kwammen tien heerlike Portugesies uut de ovend!