Porseleinkoorts

Vandaege he’k mit de trein naor Liwwadden west. Ik hebbe netuurlik op ‘e vri’jdagsmark keken. Die was vandaege op ‘e Ni’jstad, et Wilhelminaplein wodde klaormaekt veur et feest van morgen. Ik hebbe twie poeden biologische bolties van bakker Bolhuus kocht. Ik hebbe wat drinken en een tosti had in et resteraant van et Fries Museum. En… ik hebbe de tentoonstelling Porseleinkoorts in keramiekmuseum Prinsessehof bekeken. Het witte goud van Augustus de Sterke en Madame de Pompadour. Dat weren grote posseleinliefhebbers. Ze gadderden prachtige verzaemelings bi’j mekaander. August de Starke (1670 – 1733) was keurvost van Saksen en keuning van Polen. Hi’j was de oprichter van de Meisser posseleinfebriek. Meissener posselein is wereldberoemd. Madame de Pompadour (1721-1764) was de maîtresse en… kultureel adviseur van keuning Lodewiek XV van Frankriek. Zi’j was bescharmvrouwe van de Sèvres posseleinfebriek. Dat is ok wereldberoemd spul. Een protte belangrieke en rieke meensken verzaemelden in die tied posselein: tsarina Catharina de Grote van Ruslaand, keizerinne Maria Theresia van Oostenriek, keuning Frederik de Grote van Prusen… Ze kochten zovule dat ze d’r soms een appat peleis veur bouwen leuten. Et is hiel goed dat ze dat allemaole daon hebben, want daoromme kun wi’j disse prachtige tentoonstelling now in Liwwadden bekieken. Ik hebbe in dat museum ok wat drinken had mit een lekker gebakkien d’r bi’j. In de trein naor huus zag ik een stokmennig jongen in oranje jakken en shirties. Die weren grif onderweg naor et feest van morgen. Hieronder twie foto’s die ‘k in keramiekmuseum Prinsessehof maekt hebbe: prachtig kleurd posselein en een witte pietá. Die wodde maekt in opdracht van de slim godsdienstige zeune en opvolger van August. Een pietá is een beeld van Maria mit heur van et kruus haelde zeune op ‘e schoot.