Poeslief

Vlak veurda’k gisteraovend naor de spannende misdaodserie Deceit kieken zol, zag ik dat d’r een dooie moes in de hal lag. Ik hebbe dat ding gauw opruumd en gong d’r doe lekker veur zitten. Ik keek nog mar een menuut of wat en doe kwam poes Marja mit een levendige moes de kaemer in. Wat toch een gedoe om mi’j onder et kieken naor een spannende film daor mit an te kommen. Ik hebbe de moes in de hal overmeesterd en die butendeure brocht. Poes was doe zo speuls en wild in de huud wodden dat hi’j mit zien speulgoedmoes deur de kaemer begon te stoeven. Onderwegens raegde hi’j een schiemerlaampien ondersteboven. Ik hebbe poes doe kwaod ankeken en zegd da’k him lichtkaans naor een heropvoedingsinstituut veur katten sturen zal. Poes keek mi’j wat hooghattig an en doe wus ik drekt da’k et bi’j et verkeerde aende hadde. Ik hebbe naemelik krek et boek Poeslief lezen. De mooiste katteverhaelen van W.F. Hermans, Annie M.G. Schmidt, Yvonne Keuls, Godfried Bomans, Clare Lennart en nog een protte aanderen. Clare Lennart schrift in heur verhael: Zelfs dat hele kleine poesje, dat balletje dons, dat nog zo wankel op de pootjes staat, heeft in zijn ronde kattekopje al een eigen, onverzettelike wil. Doe er maar eens wat aan als dat poesje precies in uw naaidoos wil slapen of de nageltjes aan de ruggen van uw boeken wil scherpen. U wilt niet dat het op tafel zit? Maar als dat poesje zich in zijn kopje heeft gehaald, dat het zo lekker warm zitten is op dat wollen tafelkleed, is het na enige tijd zijn vaste plaats. Het spint eenvoudig uw tegenstand weg. En zo gaot et hier ok. Ik hebbe poes aaid om et weer goed te maeken en him wat lekkers geven. Hi’j hoeft netuurlik niet naor een heropvoedingsinstituut veur katten. Hi’j hoeft him niet an te passen an mi’j, ik heure me an him an te passen!