Poerbest proemejaor

Et is een poerbest proemejaor. Hier in et dorp staot argens een kiste vol proemen bi’j de weg veur de liefhebbers. Een vri’je gift wodt op pries steld. Ik bin daor vandemorgen henne west om wat op te haelen en hebbe netuurlik wel wat in de busse daon. Ik zag wel dat d’r nog een hieleboel an de boom zitten. Daornao bin ‘k om half twaelf op ‘e fiets stapt veur een tochien van 48 kilemeter. De zunne was d’r vaeke bi’j en et wodde 19 graoden. Lekker fietsweer. De kotte broek kon wel an, mar een jassien an was ok niet verkeerd. Ik kreeg twie keer een snittertien waeter en d’r ston vandemiddag een best stok wiend. Wat wodt et trouwens al  haastachtig. Mar de hempies en et duzendblad bluuien nog uutbundig naost et Lendepattien. Tussen et Wiede van de Lende en de Driewegsluus zag ik een fesantehaene in de roegte ommescharrelen. Ik hebbe al in jaoren gien fesantehaene meer zien. Of he’k me verzind? Ik daenke van niet. Ik bin naor de Driewegsluus fietst en doe naor de Scheenesluus. Daor he’k in de theetuun een peer koppies drinken had en een panini schinke/keze. Ik hebbe nog twie stokkies Blokzielder Brokke mit naor huus neumen. Et wi’jde zo hadde dat een parresol ondersteboven gong. Over Oolde- en Ni’jlaemer bin ‘k naor Wolvege gaon. Vlakbi’j de Brogge van Jikke over de Schipsloot staot een proemeboom en et ligt d’r bezi’jd mit proemen in et grus. Daor he’k ok nog een fluttien bi’j mekeer zocht. Et is zunde dat et allemaole ommekomt. In Wolvege he’k nog wat bosschoppies daon. Een man in de supermark vertelde me dat zien rogge versleten was. Aj’ mit meensken praoten gaot et almar over dat soort ongemakken. Hieronder twie foto’s. Boven: de Scheenesluus. Onder: proemen an de weg in Ni’jhooltpae.