Podcast

Op 22 feberwaori zal Elizabeth Bergsma mi’j interviewen in de radiostudio van Odrie in Oosterwoolde over mien schrieveri’je en vertelderi’je. Et wodt een pergramme van een ure: drie kertier praoten en een kertier meziek. Et komt as podcast beschikber en die komt ok op dit webstee te staon. Bi’j de rebriek video’s op mien webstee staon twie videos’s van gedichten van mi’j. Ze bin een peer jaor leden maekt deur Pat van Boeckel. Mar op ‘e video van Mien oolde huus staot al een schoffien Sorry, this video does not exist. Lichtkaans dat et goenend al opvalen is. Ik hebbe Pat d’r over maild. Die was doe krek in Indonesië an et filmen, mar mailde me wel weeromme dat et gien technisch ongemak bi’j mi’j is. Et dee blieken dat d’r over de meziek die in die video te heuren was, gien rechten betaeld binnen. Dat zodoende is de boel dus blokkeerd. Pat zal nog es kieken as et oplost wodden kan. Et zol spietig wezen as dat niet kan. En dan ok nog een mooi bericht: in drie van mien elf ammarillen he’k al een mooie knoppe zitten. Ik hope dat d’r meer kommen en dat zal grif wel.