Pinksterbloemen

Gister zaggen Fettje en ik een hoeke laand tussen Appelsche en Else dat geel ston van de peerdebloemen. Ik vien dat aenlik krek zo mooi as velden vol tulpen. Tussen Noordwoolde en Zaandhuzen zag ik laeter een hoeke laand vol bluuiende pinksterbloemen. Ok al hiel arg mooi. Die bloemen hebben trouwens een verkeerde naeme. We hebben de paosdaegen nog niet iens te pakken en de pinksterbloemen bluuien al. Et bin meer paos- as pinksterbloemen.

Vandemorgen he’k eerst een auto vol bosschoppen haeld in Wolvege en ik bin doe ok drekt naor Marian west veur fysio. Ik hebbe beheurlik hinder van spieren en gewrichten. Now ja, die gewrichteboel is vanzels een keer of en versleten. Ik kan drekt niet weer naor heur toe, want ze zal veur een kuiervekaansie naor Italië mit eindbestemming Florence en gaot dan elke dag twintig kilemeter lopen. Mien hemel nog an toe, ik zol nog gien vuuf kilemeter volmaeken kunnen. Mar ja, zi’j is ok nog lange niet zo oold as ik bin. Nao de fysio bin ‘k naor de Schrieversronte in Berkoop west veur een vergeerdering over et geheime projekt. Sund november praoten we daor al over en warken we daor al an. Et zal liekewel niet hiel arg lange meer geheim blieven. Et is de bedoeling dat et in de loop van meie in de kraanten komt te staon.