Pim Lammers

Ik hadde vandemorgen krek in de kraante lezen dat Pim Lammers doodsbedreigings kregen hadde of ik wodde al beld deur Omroep Frieslaand wat mien miening daor over was. Et bewuste verhael daor alle gedoe over is ken ik niet. Mar ik vien et verschrikkelik. Aj’ vienen dat iene verkeerde dingen daon het, dan kuj’ angifte doen bi’j de pelisie en dan maekt de rechter wel uut aj’ geliek hebben of niet. Zo heurt dat in een demekraosie te gaon. Mar dat alderhaande volk anoniem via sociaole media, meensken daor ze et niet mit iens binnen, doodsbedreigings stuurt, dat is utermaote geveerlik. Zokke volksgerichten taasten oonze vri’je demekraosie an. Daor zal echt wat an daon wodden moeten. Ik las op internet dat de verkopen van Pim zien boeken in de hoogte schieten. Dat is mooi. Ik beschouwe et as een ere dat ik zien mooie kienderboek Et laompien dat een varken is vertaelen moch in et Stellingwarfs. Et boek is bi’j de Stellingwarver Schrieversronte nog volop te koop!

En dan nog even over Goes. Zaoterdagmorgen he’k mit Roelien de stad in west. Ik hebbe Zeeuwse bolussen bi’j de waarme bakker kocht veur Anke die op poes past het en in een aandere winkel he’k ok nog wat voegelvoer insleugen. In et centrum van Goes was mark en daor zaggen we een prachtige kleine springador, die graeg deur oons aaid wodden wol. Middags hewwe een kuier maekt over de diek, daor een koppeltien schaopen leup. We hebben doe in de kantine van et overdekte zwembad wat drinken en een brotien had. Ik hebbe die dag 8,7 kilemeter lopen. Dat he’k in jaoren niet daon, dat de spieren deden me best zeer. Gister hewwe, veurda’k weer op huus an gong, ok nog een kleine  kuier maekt. Ik bin gistermiddag om twie ure in Goes in de auto stapt en om half zesse wa’k thuus. Hieronder nog een foto van gister. Disse schaopen leupen ok op ‘e diek bi’j Goes.