Pietereuliekachel

Doe ‘k vandemorgen van bedde kwam, zag ik drekt dat poes hiel wonderlik dee. D’r zat ongetwiefeld wat aachter de grote klerekaaste. Hi’j hadde weer es een levendige moes mit in huus neumen. Now ja, ik kan zoe’n zwaore kaaste niet van de kaant kriegen. Mar even ofwaachten dus… We bin d’r vandaege weer in de buurt op uut west. Ik hebbe wat goold en veural zulver verpatst. Dat is de laeste tied ommeraek an de pries. Dan hebben mien executeurs daor laeter gien drokte meer mit en belaant et bi’j ongelok niet in de kontener. We bin eerst mit et spul naor et gooldwisselkantoor in Et Vene west en doe ok nog naor Feddema in Drachten. Die laeste beud et meerste, daor he’k dus zaeken mit daon. In de loop van de middag hewwe in Noordwoolde een pietereuliekachel kocht in verbaand mit de griezelige toestaand in de wereld. Die kon ‘k makkelik betaelen van de opbrengst van et goold en zulver. Dat as die griezels in Moskou en Peking hier de boel in ’t wilde brengen willen, en dat willen ze, dan kan ik zonder stroom toch lekker waarm in huus zitten. We hebben heerlik eten in resteraant Boszicht in Ni’jberkoop. Dat kon d’r ok best of! We weren d’r al om half vufe. Meer volk was d’r doe nog niet, mar veur half zeuven weren d’r een protte taofelties risserveerd. Ie kun d’r heerlik eten en waor kriej’ nog vuuf soorten gruunte bi’j et eten? In Ni’jberkoop! Hier kan Van der Valk in de veerste veerte niet meer tegenop. Hieronder een foto van een doe nog leeg en smoek resteraant. Weer thuus kwam de moes veur ’t locht, dat we hebben tegere de jacht eupend en de moes levendig butendeure brocht.