Johan Veenstra
Stellingwarver schriever en verteller

Piet Paulusma

Plaetst op 21 meert 2022.

Ik bin de gister veur oons onverwaachs wegraekte weerman Piet Paulusma ien keer in et echt tegenkommen. Et is al hiel wat jaoren leden, misschien wel dattig jaor. Ik vertelde in die tied mien wekelikse stiekelstokkies veur Omroep Frieslaand-radio. Mit Piet Paulusma wodde ik doe op et jaorlikse Flaeijelfeest in Oolde- en Ni’jehoorn vraogd om in een jury te zitten. Wie d’r meer in die jury zatten weet ik niet meer. Mar ze hadden daor doe een wedstried wie de beste stads- of d√∂rpsomroeper van Frieslaand was. Wie we doe as beste uutkeuzen hebben, weet ik ok niet meer. Ik wete nog wel dat Piet et vreselik drok hadde. Hi’j mos rap weer argens aanders henne. Dit scheut me in de zin doe ‘k van zien wegraeken heurde. Hi’j warkte tot et laeste an toe. Ik zol et ok wel mooi vienen as mi’j dat geven wodden zol. Tot et laeste an toe wat deurdoen kunnen. Ik bin now trouwens al elf jaor oolder as dat Piet Paulusma wodden is en… ik gao vanaovend gewoon weer an ’t wark. Ik doe mar rustig wat deur. Ik hebbe de laeste daegen alle teksten flink rippeteerd en gao vanaovend vertellen in de eupenbaore biebeltheek in Vledder. Ik zie wel as d’r wat volk komt. Mar ok al bin d’r mar weinig meensken, ik hebbe d’r een protte nocht an!