Piano & Poëzie

In verbaand mit et weer was et vandaege dudelik minder drok op Eupen Stal as de laeste daegen. Dat betekent dat d’r ok lange zovule niet verkocht wodt. Dat is spietig. Een vrouw vertelde me dat ze indertied zo geneuten hadde van een verhael van mi’j. Een verhael over een deken die uut de locht vul. Et wil me niet heugen da’k ooit zoe’n verhael schreven hebbe. Mar toe dan mar. Ik kriege wel vaeker zokke dingen te heuren en dan wee’k d’r zels hielemaole niks van. Neffens mi’j husselen de meensken van alles deur mekeer henne.

Op vri’jdagaovend 15 augustus is d’r in et kader van Eupen Stal een aovend in Le Brocope an de Oosterwoldseweg. Waor vroeger Appie Tjalma zat. Et pergramme hiet Piano en Poëzie. De aovend wodt verzorgd deur Wolter Hoeksema, Syds Wiersma en Johan Veenstra. Wolter Hoeksema is een jonge pianist, kompenist en mezieklerer uut Zwolle. Zien debuutalbum Norge is te beluusteren op spotify. Syds Wiersma is een  bekende dichter. Hi’j lest zien gedichten veur in et Fries. En ik vertelle die aovend een verhael en leze ok gedichten veur. De toegang is gratis en veur niks. Meensken moe’n heur liekewel wel anmelden bi’j info@openstal.nl Verschillende meensken hebben me verteld dat ze d’r hennegaon, mar misschien bin d’r nog wel een peer plakkies over.