Petret

Ik hebbe vandaege nog wat verhaelen rippeteerd veur de optredens van vanaovend en morgenaovend. Vanaovend hoef ik niet al te veer vot. Ik mag verhaelen vertellen veur de leden van de vrouwludeverieninge Wilhelmijn in Willemsoord. De aovend wodt hullen in dörpshuus Et Kloniehuus. Ik gao d’r aanst mit groot genoegen henne.

Hieronder een tekening die ien disser daegen van mi’j maekt wodde. Herkennen jim mi’j? Ik vien et in ieder geval mooi. De tekening is maekt deur Michel (Mike) Canter. Mike gruuide op in Rhodesië, et tegenwoordige Zimbabwe. Laeter gong hi’j mit zien oolden naor Zuud-Afrike. En nog weer laeter warkte hi’j in een kibboets in Israël. Daor warkte ok een slim aorig maegien uut Ni’jleusen. En ja, ze vunnen mekeer ok slimme aorig. Zo gaot dat bi’jtieden. Zo kwam Mike uut Afrike in Ni’jleusen terechte. Ze wonen now in Zwolle en bin de oolden van Chris Canter, een hiele goeie Nedersaksische schriever die in Madrid woont. Vleden zundag troffen we mekeer bi’j Tael an Taofel in Dwingel. We praotten daor nog wat nao en d’r wodden foto’s maekt. Van ien van die foto’s maekte Mike dit petret van mi’j. Ik wete niet as et te koop komt, mar as dat zo is kan de femilie Canter daor wel es flink beter van wodden. De priezen van goeie keunst zitten de laeste tied beheurlik in de lift! Een petret dat Andy Warhol indertied maekte van keuninginne Beatrix het een kaptaol opbrocht. We zullen et zien!