Peter Lazarov

Vannaacht ston d’r inienend een bestelbussien bi’j me veur ’t huus. Dat ston d’r nog niet doe ‘k op bedde gong. Vandemorgen ston et d’r nog. Et zol et begin van een thriller wezen kunnen… Op een briefien veur de veurrute ston een mobiel tillefoonnommer en de tekst Sorry, auto is kapot. In de loop van de middag is de boel bliekber ophaeld, mar dat heb ik niet zien. Ik zat een groot diel van de dag in mien warkkaemer. Ik hebbe alle verhaelen rippeteerd die ‘k ankem weke vertellen zal. Zundag za’k alles nog es een keer rippeteren. Ik mag ankem weke woensdagmorgen vertellen in et Seniorkefé van de biebeltheek van Et Vene. Ik bin daor tien jaor leden ok west. Dit wodt dus de laeste keer.

Ik hebbe et boek Peter Lazarov prenten voor/prints for Christos Giannakos lezen en veural uutvoerig bekeken. De tekst van Pieter Jonker is in et Nederlaans en et Engels. De hooltgravures van Peter Lazarov bin wondermooi en gaon over verhaelen uut de mythologie. Peter Lazarov het veertien jaor laank warkt an series prenten die hi’j maekte veur de Oold-Griekse dichter Christos Giannakos. Al dat moois is now dus in dit boek te bekieken. Et boek is prachtig uutgeven in een hadde baand. D’r staot ok een lieste mit naemen in van meensken die op et boek intekend hebben. Daor stao ik vanzels ok tussen.