Per sekonde wiezer

Ik kieke mar naor weinig kwissen op ‘e tillevisie. Twie veur twaelf en Per sekonde wiezer bin d’r al hiel arg lange en die vien ik beidend ok nog altied mooi om naor te kieken. Gisteraovend was Per sekonde wiezer d’r veur en krek doe keek ik niet. Mar ik wodde deur kammeraod Jelle uut Sneek appt da’k sebiet de tillevisie anzetten mos om d’r wel naor te kieken. En doe zag ik Christine Mulder dus. Christine schrift gedichten in et Stellingwarfs onder de naeme Stien van Anne, ze het een kienderboek vertaeld in et Stellingwarfs en nog niet zo lange leden kwam van heur et boek Et pad van de griffioen uut. Een boek mit vuuf literaire fietstochten deur de Stellingwarven. Christine warkt bi’j de Stellingwarver Schrieversronte in Berkoop. En ze dot now dus mit an de kwis Per sekonde wiezer. Ze kwam glaansriek deur de eerste ronde. Knap heur. Ik zol zoks nooit kunnen. Ik bin raozend beni’jd hoe as et now veerdergaot!

Vandemorgen he’k eindelik es weer naor fysiosport west in Wolvege. Ik was een keer verkolen, de boel was mit de feestdaegen  dichte en vleden weke was et dichte vanwege et winterweer. Ik kon wel marken da’k et een posien niet daon hadde. Ankem weke za’k ze daor nog trakteren vanwege mien verjaordag.

Vandemiddag was poes weer es een keer te zuke. Ik hebbe et hiele huus deur west en doe zag ik in de slaopkaemer beneden, daor de elektrische fiets overwintert, een dikke bobbel onder et dekbedde. Poes was weer terechte.