Peazens-Moddergat

Tot mien grote schrik zag ik vandemorgen in de kraante dat Hilly Harms wegraekt is. Een geweldige aktrice en een slim aorige vrouw. Ze is twie daegen nao heur 87^ste verjaordag uut de tied raekt. Ik zag heur jaors op ‘e Eupen Stal, dan kocht ze geregeld een boek van me. Mit Douwe bin ‘k ok een keermennig op ‘e fiets bi’j heur op vesite west in Jistrum. En Fettje en ik hebben begin dit jaor nog een optreden van heur bi’jwoond in de Schierstienze in Veenwoolden. En zo raekt de iene nao de aandere bi’j oons weg.

Mar wi’j bin d’r nog en we bin vandaege op stap west. Krek as vleden weke hewwe een tippe kuierd. Vleden weke hewwe een straandkuier maekt in Callaansoge en vandaege biwwe naor Peazens-Moddergat reden. Daor ligt een dam een hiel aende de zee in en daor hewwe een kuier over maekt. Ie lopen dan as et waore recht op Schiermonnikoge of. We zaggen de vuurtoren dudelik staon en de veerboot veerde van et eilaand naor Lauwersoge. Eerst was et bewolkt, laeter kwam de zunne d’r volop bi’j. In resteraant Waddengenot aan Zee in Lauwersoge hewwe lekkere kibbeling en petat had. Van daor hej’ een prachtig uutzicht over de zee. Hieronder nog twie foto’s. De Wadden bewolkt en de Wadden in de zunne.