Johan Veenstra
Stellingwarver schriever en verteller

PCOB/KBO

Plaetst op 24 jannewaori 2025.

Vandemiddag wa’k in de Sionskarke van Ooldeschoot. Daor moch ik vertellen veur de leden van PCOB en KBO. Ik docht dat d’r lichtkaans wel es niet zovule meensken kommen zollen vanwege et wienderige en regenachtige weer. Mar… d’r mossen nogal wat stoelen bi’jzet wodden, zovule vlocht kwam d’r op ‘e kooi. De zael zat hatstikke vol en dat was hiel mooi. De veurzitter begon hiel toepasselik mit et biebelverhael over et bouwen van de Toren van Baobel, doe God de tael van de meensken veraanderde en ze mekeer niet meer verstaon konnen. Daor ha’k vandemiddag gien last van, iederiene kon et Stellingwarfs prima verstaon. Ik hebbe heerlik vertellen kund veur een vreselik aorig en goed reagerend pebliek. In et schoft kwam d’r een vrouw bi’j me die zee: ‘Ik vind u zo’n leuke man!’ Dat zal je mar zegd wodden op je negenenzeuventigste! Now bin d’r grif ok meensken die dat niet vienen, mar daor hoef ik veerder ok niet goed mit akkederen te kunnen. Ex-kollega Jan zit daor in et bestuur, dat ik hebbe vanaovend bi’j him en Baukje broodeten. Dat was lekker en genoeglik. Jan en ik hebben lange jaoren op ‘e zelde ofdieling van de belastinginspektie zeten, et Centraol Kaortregister (CK). We hebben zodoende mooi wat bi’jpraoten kund. Hieronder een foto die me vandaege toestuurd wodde deur Tiemen Stuiver. Hi’j het disse foto eregister van me maekt doe ‘k verhaelen vertelde veur Probus in Parkhotel Tjaarda in Oranjewoold. Hier bin ik drok an ’t woord. Ik zag d’r vandaege krek zo uut, want ik hadde etzelde verstruperspakkien an.