Johan Veenstra
Stellingwarver schriever en verteller

Parkhinken

Plaetst op 25 juni 2022.

Ni’jhooltpae viert zien d√∂rpsfeest. Gisteraovend was de d√∂rpskwis en dat he’k weten. Ze kregen nogal muuilike vraogen en bliekber daenken nogal wat meensken dat ik alles wel wete. Zodoende wodde vier keer mien hulpe inreupen. Ik wodde beld a’k ok wus hoe mien ni’je buurvrouw hiet. Now, dat weet ik vanzels wel. En ik kreeg drie dielnemers in huus mit hiele muuilike vraogen over voegels. Ze hadden een hiele riegel voegels mit Stellingwarver naemen en ze mossen de Nederlaanse naemen van die voegels opschrieven. Et was echt hatstikke muuilik. Ik wus vanzels wel dat een bouwmannegien een kwikstaart in et Nederlaans is, mar de rest wus ik ok niet. Die naemen he’k nog nooit van mien leven bruukt. Mar in Et Stellingwarver Voegelboek vun ik alle antwoorden in een ommedri’j. En zo weet ik now ok dat Jelle Waeter een koekoek is, een lipketip een scholekster, een vliegende deure een zeearend en een Dame mit et lange gezicht is in et Nederlaans een houtsnip.

Ik hebbe vleden weke nog een verhael toevoegd an de serie langere verhaelen daor a’k bi’jtieden mit doende bin en wat aenlik ooit nog es een boek wodden moet. Jelle en Geertje hebben et intied lezen en vienen et goed genoeg veur et boek! Dit verhael het de titel Parkhinken kregen en et telt 1957 woorden. Alle verhaelen zitten om de 2000 woorden henne. In een kleine stad in de Kop van Overiessel woont een man die krek een fietstocht deur de Weerribben maekt het. As hi’j weer thuuskomt en deur et raem butendeure kikt, zicht hi’j een maegien van een jaor of zesse op een baank bi’j de grachte veur zien huus zitten. Een maegien in hiele oolderwetse kleren. Wie is dat maegien en wat is d’r toch mit heur?