Pantropica

Ik was vandemorgen om kwat veur achte al in et ziekenhuus. Tot half tiene mos ik aanderhalve liter spul opdrinken om van binnen hielemaole leeg en schone te wodden. Daornao mos ik zowat drie kertier op ‘e boek in de scan liggen. Et vul me al mit al niet mit. En now kommen d’r nog twie maldere daegen. Ik docht vanzels in et ziekenhuus ok an kammeraod Haarm. Die wodde op dat mement oppereerd in et ziekenhuus van Liwwadden. Dat et mit oons beidend mar goed oflopen mag!

Om de zinnen wat te verzetten hewwe vandemiddag toch even op stap west naor Pantropica oftewel de Orchidenenhoeve in Luttelgeest. Daor gaon we ien keer in et jaor henne. Et was d’r drok. Eerst hewwe daor een koppien drinken mit een gebakkien had. En doe hewwe alles bekeken. De aepen, flamingo’s, orchidenen, vlinders en al die aandere mooie bloemen van de hangende tunen. Netuurlik hewwe de pappegaaien en de vissen voerd. We hebben an et aende van de middag een kleinighied eten in sjefeurskefé De Stoof in Wolvege.