Oud, maar goud!

Vandemiddag he’k naor aachterneve en iemker Piet an de Heirweg in Wolvege west om acht potten hunning op te haelen. Hunning is vanzels et lekkerste aj’ et rechtstreeks van de iemker kopen. Ik hebbe d’r een peer koppies thee mitdronken en we hebben even genoeglik bi’jpraot.

Doe halverwege december mien petret as ereburger onthuld wodde in et gemientehuus in Wolvege kree’k alderhaande mooie kedogies. Ik kreeg o.a. et boekien Oud, maar goud! van Tom Hay. Alderhaande grappen en citaoten over et oolder wodden. Dat komt dus wel van passe. Ik vertelle ien van die verhaelties hier even in et Stellingwarfs nao. Een dokter en sekstherapeut zegt dat hi’j an et lachen, glimken en glunderen van de meensken zien kan hoe vaeke as ze seks hebben. Hi’j het een zael mit 100 meensken veur him zitten. Bi’j 99 van die meensken het hi’j et votdaolik goed. En dan komt de honderdste an bod. Een ooldere man die glundert van oor tot oor. De dokter is d’r drekt uut en zegt: ‘Twie keer op een dag.’ Mar de man schuddet van nee. ‘Ien keer op een dag dan.’ De man schuddet weer van nee. ‘Twie keer in een weke’. Mar dat is ok niet goed. ‘Twie keer in een maond.’ Mar de man blift van nee schudden. Uuteindelik zegt de man van ja as de dokter zegt: ‘Ien keer in et jaor dan.’ Dat klopt dus. ‘Mar waoromme glunder ie dan toch zo?’ vragt de dokter. ‘Vanaovend is et zoveer,’ zegt de man.