OSON

Vandaege he’k drok doende west mit bakken en koken, want ik kriege morgenaovend vier eters. Ik hebbe een grote panne mit gruuntesoep kookt en ik hebbe een ovendschottel mit eerpelpuree en zoerkool toemaekt. Butendat he’k een botterkoeke bakt mit een vulling van abrikozen en viegen. En now za’k aanst et pad uut. Ik stappe bi’j oons mfc De Ni’je Stienze mit aanderen in de bus en dan gaon we mit mekeer naor resteraant Pieter Poot op ‘e Blesse veur et kastdiner van de OSON.

Hieronder nog een foto (een betien schieve) die ‘k gister maekt hebbe van ien van de in Jugendstil-stijl braandschilderde raemen in Villa Rams Woerthe in Stienwiek. Op een bod bi’j de weg staot: Villa Rams Woerthe. Kom binnen in het Downton Abbey van Overijssel. Hoe mooi as et ok is, dat liekt me toch een hiel klein betien overdreven! De femilie Tromp Meesters hadde daor indertied trouwens mar liefst zestien tuunmannen an ’t wark!