Orvelte

Vandemorgen kwam de kraante weer in de busse. Eindelik! Et is me niks om de kraante op ‘e komputer te lezen. D’r kommen donderdags trouwens drie kraanten. Ik leze behalven de Liwwadder Kraante de Stellingwarf en de Ni’je Ooststellingwarver ok. Now is alles weer gewoon!

We bin d’r vandaege op uut west. Et was gien mooi fiets- of bootweer, dat we bin naor et bekende Drentse museumdörp Orvelte west. Prachtig! Ik was d’r in wel 25 jaor niet west, dat ik herkende et Tolhuus drekt wel, mar veerder wus ik d’r niet vule meer van. Et bin ok allegeer ni’je dingen. We hebben alles bekeken, mar bin uut aende zet in et Bakkershoes, daor hewwe wat drinken had en een plakke heerlike Drentse koeke mit boerejongen en een fluttien slagroom. Ze bakken daor elke dag van die lekkere koeken. Ik hebbe d’r vanzels iene mit naor huus neumen. We bin in een oolde boerderi’je west uut 1670 of daoromtrent en in een nog ooldere boerderi’je. Pattie stieleboel stamt in dat huus uut 1599. Dat is een jaor veur de Slag bi’j Ni’jpoort. Prachtig om alles te bekieken. In een pankoekbakkeri’je kregen we een stokkien pankoeke mit benaan te pruven. We hebben wat van dat spul mitneumen om et thuus zels ok maeken te kunnen. In de Flintenhof he’k een prachtige ronde stien (selemiet) uut Marokko kocht. We hebben oons ok fietsroutes anschaft zodawwe daor es fietsen kunnen. Prachtig om es weer in Orvelte west te hebben! Een mooie poes het een aentien mit oons oplopen. Hi’j wol graeg aaid wodden en dat is dus ok gebeurd. We hebben vanaovend lekker waarm eten had in De Rustende Jaeger in Hooltpae. Heerlike scholfilet. Hieronder twie foto’s die ‘k vandaege maekt hebbe. Boven: et Bakkershoes. Onder: oolde boerderi’je mit stieleboel uut 1599.