Orchidenenhoeve

Et was vandaege gien weer om uut fietsen te gaon of om mit de boot et waeter op te gaon. Dat was spietig! Mar we bin d’r wel op uut west en wel naor de Orchidenenhoeve in Luttelgeest. Daor kuj’ elk jaor best een keer henne. Et is d’r altied mooi! De bloemen, vlinders, aepen, flamingo’s, vissen, pappegaaien… Zoas altied hewwe de pappegaaien en de vissen voerd. Ik hadde op een gegeven mement vier pappegaaien op beide aarms zitten. Ze maeken een mal geluud, mar ze bin prachtig om te zien. Bi’j de hangende tunen hewwe wat drinken en een heerlik gebakkien had. Op weg naor huus biwwe bi’j Schoterziel, et kleinste dörpien van de Stellingwarven mit omtrent 37 inwoners, de Lendediek opgaon. We hebben wat eten en drinken had in et paviljoen bi’j de Driewegsluus. Ik hebbe om goed vier ure een twaelfuurtien had mit een koppien heerlike aspergesop d’r bi’j! Een mooie dag! Hieronder een foto die ‘k vandemiddag maekt hebbe.