Orchidenenhoeve

We bin vandaege op stap west naor Luttelgeest. Ien keer in et jaor gaon we naor de Orchidenenhoeve en altied om disse tied van et jaor. Dan is de boel in kastsfeer. Et hiet daor tegenwoordig Pantropica, mar ik blieve gewoon van Orchidenenhoeve zeggen. Et is altied weer mooi en et veraandert ok hieltied weer. Ze bin now ok weer drok an ’t verbouwen. We hebben daor trouwens eerst hiete poeiermelk en een lekker gebakkien had. En vervolgens hewwe weer geneuten van de orchidenen en de aandere bloemen. Veural die in de hangende tunen. En veerder is et aenlik ok een dieretuun mit vissen, aepen, schildpodden, flamingo’s, pappegaaien en vlinders. We hadden zels voer veur de vissen mitneumen. In de ruumte mit de hangende tunen hewwe nog wat drinken had. Et was spietig dawwe de redens niet mit hadden, want d’r is now ok een iesbaene. Ik hebbe een mooie paors/witte orchidee in een orchidenepot kocht. Die staot hier now in mien warkkaemer te pronke. Ik hebbe hier now vier bluuiende orchidenen staon en in twieje kommen opni’j knoppen. We hebben vanaovend lekker eten had in et resteraant bi’j de Koepelbos in Berkoop. Elk een gehakballe mit petat en andievie. Hieronder twie foto’s die ‘k vandaege maekt hebbe.