Orchidee

Sund vandaege he’k gien koorse meer. As dat nog wel zo west hadde, ha’k de dokterswaacht bellen moeten. Mar et blift veurlopig een geklongel, want ik hebbe een protte last van de bi’jwarkings van de antibiotika. Hieronder een foto die Haarm en Jacob me toestuurden. Doe ‘k vleden weke even bi’j heur was, leuten ze me een orchidee zien mit 67 bloemen. Iene die ze dus opni’j in de bluui kregen hadden. Laeter stuurden ze d’r nog een foto van toe. Prachtig! As d’r dagboeklezers binnen die wat biezunders zien of zo… Maek d’r gauw een foto van en stuur me die toe. Dan komt hi’j lichtkaans bi’j een dagboekstokkien te staon. Stel jim lopen mit de hond deur de bos en zien stom toevallig twie keboolters uut een grote poddestoel kommen. Maek d’r een foto van. Die komt hier dan te staon mit jim naeme d’r vanzels bi’j. Een aander veurbeeld. Een plattelaanskerel staot op een heldere aovend butendeure te pissen, kikt naor de locht en… zicht een ufo. Perbeer d’r een foto van te maeken en stuur me die toe. Jow naeme komt d’r bi’j!