Orchidee

Eindelik weer een dag heerlik weer. Ik bin vandemiddag op ‘e fiets naor Marian in Wolvege west veur fysio. Dit was (veurlopig) de laeste keer. Et gaot now wel weer goed, mar ik wete da’k ieder jaor wel een riete hebbe da’k naor heur toe moet. Ik bin daornao naor de slaachter in Wolvege west en daor he’k wat kaant en klaore maoltieden kocht. Ze bin grif lekkerder as dat spul uut de supermark. En et eten koken komt de kommende tied lichtkaans niet al te vule van a’k weer vier weken in Berkoop op Eupel Stal ommeheistere. Dan bin ‘k aovens om half 7 eerst thuus en dan he’k gien nocht meer om eten klaor te maeken. Now eet ik altied waarm tussen de middag, mar dat betekent da’k dan om half 12 al waarm eten moet. Dan is et makkelik a’k zo wat in de ovend drokken kan.

Et was gister op 14 juli percies een jaor leden dat mien laeste boek Naozoemerlaand uutkwam. Dat was doe een blinders mooie bi’jienkomst in oons mfc De Ni’je Stienze. Bi’j die gelegenhied kreeg ik een mooie orchidee van Its en Anke. Die orchidee staot hieronder, ik hebbe him vandaege op petret zet. Hi’j het echt et hiele jaor an ien stok deur bluuid en hi’j zicht d’r nog prachtig uut. Et is onveurstelber.