Oranjekonsert

Et is Keuningsdag en ik hebbe naor et feest in Rotterdam keken. Et was an de frisse kaant, mar gelokkig dat et dreuge bleef. De Oranjes hadden gien jassen an, dat ik hope mar dat ze wel halfwollen hempies an hadden. Mar et was mooi om naor te kieken. Vanaovend za’k mit Fettje naor et jaorlikse Oranjekonsert van de kristelike brassband Euphonia in sporthal De Steense in Wolvege. Dat is ok altied een mooi feest waor honderden meensken op ofkommen. Vanaovend komt zanger Syb van der Ploeg as gaast naor Wolvege. Hi’j zingt mit Euphonia. Vuuftien jaor leden kwam Syb van der Ploeg ok naor et Oranjekonsert in Wolvege. Hi’j zong doe ok mit Euphonia en nao ofloop was d’r ok nog een minikonsert van De Kast. Ik prissenteerde et Oranjekonsert doe nog en zat veurofgaonde van et konsert tegen him over te eten in de sporthal. In de naomiddag ston d’r al een koppel jongemeiden uut et hiele laand veur de dichte deure te waachten. Doe ‘k him ankondigen moch, he’k zegd da’k eerst docht dat al die jongemeiden veur mi’j kwammen. En doe kwam Syb aachter et gedien op et podium weg en zee: ‘De plattelaansvrouwluden bin veur jow, die jonge maegies bin veur mi’j.’ Now ja, dan woj’ drekt te plak zet. Hieronder een foto van Syb en mi’j op Keuninginnedag, 30 april 2008. Onbegriepelik dat et al weer vuuftien jaor leden is…