Oranjekonsert (2)

We hebben gisteraovend in sporthal De Steense geneuten van een geweldig mooi Oranjekonsert. De burgemeester eupende de aovend en de beide wethoolders weren d’r ok. Et pergramme wodde prissenteerd deur Paul Passchier uut Munnikeburen. Dat is een zeune van Dick Passchier die vroeger altied et tillevisieverslag dee van et défilé op peleis Soestdiek. Brassband Euphonia onder leiding van Hendry van Loo speulde mooie koraalmeziek, Schotse meziek, een fleurige mars, filmmeziek… Hiel mooi. En dan de saemenwarking mit en et optreden van The Billy Joel Experience. Geweldig! Et is een tributeband die lieties van Billy Joel speult en zingt. Meziek mit passie! Wat kan die zanger/pianist Alexander Broussard de stemming d’r in brengen! Iederiene geneut! Een hiele sporthal vol volk. Iederiene was bliede dat et nao twie jaor corona weer kon! D’r weren ok vlochtelingen uut Oekraïne bi’j anwezig en dat wodde hiel ontroerend. Et konsert begon vanzels mit et staonde zingen van et eerste en zesde kouplet van et Wilhelmus. Dat vien ik altied al indrokwekkend, mar nao et schoft wodde et minstens zo indrokwekkend. Iederiene gong weer staon en doe speulde Euphonia et volkslied van Oekraïne mit een projektie van de Oekraïnse vlagge op ‘e aachtergrond. Wat moet dat emotioneel veur de vlochtelingen west hebben! In et schoft en nao ofloop he’k wat dronken en mit meensken praot in de kantine van De Steense. Een biezundere aovend en dat was et!

Vandemorgen he’k op vesite west bi’j beeldend keunstener Peter (Hiemstra) en zien vrouw Geertje in Berkoop. Sund Peter en ik, lange leden al weer, begonnen mit oons wark veur de bundel Longerlaand zien we mekeer een peer keer in et jaor. Ik gao naor heur, hi’j komt hier. En dan praoten we weer even hielemaole bi’j. Dat vien ik oe zo genoeglik. Om drie ure vandemiddag he’k veur de laeste keer wat eten had (witte bolle en beschuut) veur et jaorlikse daarmonderzuuk van morgen. Bah! Ik beginne aanst van die troep op te drinken en dat moet morgenvroeg weer. Morgenmiddag brengen ze me in et ziekenhuus in de soeze en a’k dan weer wakker wor, ma’k weer wat eten en drinken hebben. Omda’k morgen niet autorieden mag, wor ik deur Jan naor et ziekenhuus brocht en Haarm brengt me laeter weer naor huus.