Optreden mit Douwe

Vandemiddag hebben Douwe (Kootstra) en ik optreden mit een Stellingwarfs-Fries pergramme in de biebeltheek van Wolvege. We hadden daor mooi wat vlocht op ‘e kooi. D’r weren een kleine veertig belangstellenden. Neffens mi’j gong et hatstikke goed. Wi’j vunnen et mooi om daor te vertellen en van de meensken kregen we nao ofloop louter aorige en tevreden reakties. En as iederiene tevreden is, is dat hatstikke mooi. We zullen ditzelde pergramme op 10 april doen bi’j Boekhaandel Overdiep in Et Vene. Et was biezunder aorig dat de haost wel ooldste aktieve Nederlaanse schriever Dolf Verroen d’r was mit zien kammeraod Gerard. Dolf wodde ok nog even bi’j et pergramme betrokken omdat Douwe him wat vraogen stelde. Jaoren leden he’k al es bi’j Dolf en Gerard eten. Doe woonden ze nog in et oolde burgemeestershuus van Doniawerstal an de weg naor Langweer. Now wonen ze in Sunt Niek. Dolf is intied 96 jaor en het al 110 (kiender)boeken schreven. En… hi’j schrift nog altied deur. Dat za’k him dus niet naodoen. Douwe en ik hebben vanaovend eten in et sjefeurs-en truckerkefé De Stoof in Wolvege. We vulen oons slim thuus tussen sjefeurs en truckers!