Oproep veur Marja

Et was mar goed da’k gisteraovend niet ok nog naor Berkoop west hebbe veur de prissentaosie van et rappot over et Stellingwarfs. Ik kreeg onverwaachs nog een puttien wark te doen veur de Liwwadder Kraante. Jacob Haagsma van de kultuurredaktie was gister ok in de Filmkarke van Steven de Jong in Hooltwoolde om even te kieken bi’j de dri’jdag van de film De Sultan van Bercoop. Hi’j het daor een stok over schreven veur de kraante. Hi’j wol graeg dat ik et even bekieken zol en dan alderhaande citaoten vertaelen in et Stellingwarfs. Dat he’k gisteraovend dus daon.

An et aende van de morgen kwam kammeraod Douwe Kootstra hier et hiem op. We weren van doel en gao lunchen in et resteraant bi’j de Koepelbos in Berkoop. Mar doe wol Postnl eerder kommen mit een pakkien daor ik een haandtekening veur zetten mos. Dat we hebben hier thuus tomatesoep en brood had. We hebben vanzels veural ok bi’jpraot. En doe kwam et pakkien van postnl. Drekt daornao bin ‘k mit poes Marja naor de dokter in Noordwoolde west. Poes krigt ien keer in et jaor een oproep om langes te kommen veur een prikkien en zo. Poes het een klein betien gewicht verleuren. Dat moe’n we dus wat in de gaten holen. Hi’j is aanders zo gezond as wat. Misschien moe’k nog lekkerder brokkies zien te kriegen… En veerder he’k ok nog hielemaole bi’jpraot mit Fettje en Pieter. Mit allebeide he’k tillefonisch een ure praot. Al weer een drokke dag dus. Vanaovend neem ik de tillefoon niet op, ik gao rustig naor Vera kieken.