Opperaosies

Vandemorgen he’k veur de Schrieversronte een deuze mit bestelde boeken naor boekhaandel Binnert Overdiep in Et Vene brocht. Zoks moet aenlik drekt daon wodden, dan kan et spul mar verkocht wodden. Daor gaot et ommes omme. Dat now is mien laeste boek Naozoemerlaand daor ok weer te koop. Vandemiddag he’k nog even een kollum naokeken en die doe verstuurd naor de kraante en ik hebbe verhaelen rippeteerd. En doe kree ‘k et ziekenhuus an de tillefoon om de daotums of te praoten veur mien beide staaropperaosies. Die zullen wezen op 14 meert en 4 april. Daornao he’k hiel wat ofbeld. Harry zal beide keren mit me henne. Ik hebbe ok alderhaande ofspraoken en optredens ofzegd en/of verplaetst. Wat toch een gedoe en geregel allemaole. Hieronder dan nog mar een foto die ‘k gister maekt hebbe in et Netuurmuseum Holterbarg. Een onderdiel van ien van de diorama’s.