Opera

Dit is veur mien doen een slim vroeg dagboekstokkien… Wat trouwens een verschil in temperetuur. Gister was et snikhiete en et is now meer as tien graoden minder waarm. We hebben gisteraovend lekker eten op et terras van Boszicht in Ni’jberkoop. Ik hebbe zalm had. Et eten is d’r goed en de pries niet al te gek. Et ienige naodiel is et lewaai van al die auto’s en veural vrachtauto’s die vlak naost je de weg langesdinderen. Aj’ in et resteraant zitten hej’ daor vanzels vule minder hinder van, mar et was gister toch lekkerder om butendeure te zitten. We eten hier vandaege om de middag henne nog een broggien en dan gaon we vandemiddag naor Ni’jtriene veur de opera an de Scheene.We kun daor genieten van een opera die baseerd is op Lo Sposo Deluso, een niet ofmaekte opera van Mozart. Et gaot over zes meensken die op onderzuuk gaon naor een nog niet bestaond waeterdier. Nao ofloop van de veurstelling kriegen we daor allemaole waarm eten. Ik bin slim beni’jd.

Hieronder een kaorte die me toestuurd wodde deur Wim en Anke. Die bin op et ogenblik mit vekaansie op et mooie eilaand Terschelling.