Opera (2)

Vandemorgen he’k Ria naor Stienwiek brocht. Ze is daor om kwat over elven in de trein naor Rotterdam stapt. Daor mos ze even waachten op ‘e trein naor Dordrecht en doe nog even mit de bus naor Papendrecht. Ze belde me om drie ure vandemiddag mit de tiedinge dat ze thuus al an de thee zat. As ze vandemorgen in Wolvege in de trein stapt was, hadde ze een ure langer onderwegens west. Dan kuj’ beter even naor Stienwiek rieden. Et weren mooie daegen, mar now bin poes en ik weer mit ’n beidend en is et zuver wat leeg in huus…

We hebben gisteraovend meer as geneuten van de opera an de Scheene Wat een prachtige belevenis was dat! Doe we naor Ni’jtriene reden begon et almar hadder te regenen. Et was zodoende eerst de bedoeling dat de veurstelling in de grote tente wezen zol. Mar gelokkig wodde et dreuge en kon et butendeure gebeuren. Eerst weren d’r veur iederiene draankies en alderhaande lekkere happies. En doe begon om vier ure de veurstelling… Prachtig! Et teniel in de vorm van een schip lag in de Scheene en kon bewegen. De tribune lag ok in de Scheene en kon ok bewegen. Wi’j zatten hielemaole bovenan, zodawwe een roggeleuning hadden. Even wiederop zaggen we de meule Rietvink bi’j de theetuun. Wat wodde de meziek mooi speuld en wat konnen de zangers en zangeressen prachtig zingen. Op et fietspad bi’j de Scheene langes bleven de hieltied meensken een schoffien staon te luusteren. In et schoft weren d’r weer happies en draankies. En doe et twiede diel. Wat weren de kostuums ok prachtig. Waoromme bin ‘k daor toch niet eerder henne west? Nao de veurstelling was d’r veur iederiene een diner in de grote tente. Wat was dat allemaole ok geweldig goed orgeniseerd. Sippie Tigchelaar, die vroeger wel bi’j me kwam om mien stiekelstokkies veur Omroep Frieslaand op te nemen, was daor as vri’jwilliger aktief. Et eten was heerlik. En doe biwwe nao een prachtmiddag en -aovend weerommekuierd naor de Pieter Stoevezaandweg daor mien auto op et parkeerterreintien van Staotsbosbeheer ston.  Hieronder een foto die ‘k maekt hebbe veurdat de veurstelling begon. Meensken uut et hiele laand kommen altied naor de opera van Ni’jtriene an de Scheene.