Op vesite

Ik bin vandemiddag op vesite west in Sumar bi’j Ids en Eeke. Ids is een aachterneve van me. Ze bin vleden jaor bi’j mi’j west, dit was dus een tegenbezuuk. We hebben heerlik butendeure zeten en genoeglik bi’jpraot. Et is now heerlik veurjaorsweer!

Vandemorgen kwam d’r een uutneudiging van et Huus van de Taol in Beilen veur de uutreiking op 17 juni van Hieltied Onbekender, de eerste dichtbundel van Chris Canter. In 2019 kwam zien verhaelebundel Moenen uut. Ik hebbe mit ienige riegelmaot kontakt mit Chris die in Madrid woont. Hi’j is ien van de betere Nedersaksische schrievers. Ik bin van doel en gao d’r henne. D’r kwam ok een kaorte van Douwe en Romkje vanuut de Fraanse Elsas. Douwe schrift dat ze daor een protte kuieren en op twie katten passen. Beter kan een meens zien tied niet besteden! Hieronder de kaorte!