Op vesite in Zwolle

Vandemorgen he’k op ‘e fiets naor Wolvege west veur fysiosport. Et was heerlik fietsweer. Nao mien ure mit pittige oefenings hebben ze me een knieper op een vinger zet en keken naor de zoerstof in et bloed. Et maximum was 99, zee de jonge van de knieper, en ik kwam uut op 98. Dat was dus hatstikke goed. Ik vuulde me op slag dattig jaor jonger. Doe ‘k thuus kwam was d’r een mailtien van Hedzer en Roelie uut Wolvege. Ze mailden me dat ze slim geneuten hadden van de Stellingwarver Aovend in et Theater op ‘e Hoogte. En ze mailden ok dat ze vunnen dat ik d’r zelsverzekerd bi’j ston. Gister hej’m lezen kund dat ik me hielemaole niet zeker vuulde, mar bliekber was dat niet te zien. Ik kan zoks bliekber goed verbargen. Dat is dan wel weer mooi.

Vandemiddag he’k op vesite bi’j Antje in Zwolle west. Ik kwam as joongien van een jaor of negen mit een kammeraotien bi’j Antje heur oolden, Janne en Wander, uutvanhuus in Blesdieke. Mooi dawwe altied nog kontakt hebben. Heur zeune Warner en die zien vrouw uut Dalfsen kwammen ok nog even langes. We hebben gezellig praot en hiel wat bepraot. Om goed vuuf ure bin ‘k daor weer in de auto stapt. Et was zowel henne as weeromme slimme drok op ‘e grote diek.