Op vesite in Oosterwoolde

Ik bin vandemiddag op vesite west bi’j Vrouwkje in Oosterwoolde. Ze is vleden  weke woensdag 85 jaor wodden, mar doe zatten we mit de boot op et waeter. Et is veur mi’j ok vule makkeliker a’k laeter allienig een keer kommen mag. Mit een huus vol vesite verstao ik d’r niks van en he’k d’r ok niks an. Now hewwe genoeglik bi’jpraoten kund. Doe ze nog in Hooltpae woonde gong ik d’r altied op ‘e fiets henne. Dat hadde now ok wel kund, mar d’r kwammen zo now en dan bujjen. Vrouwkje heur moeder was een kammeraodske van mien moeder. Ik wete nog da’k in de dadde klasse van de legere schoele zat. Pal naost me ston de grote kaaste mit laegies daor et haandwarkspul van de maegies in zat. Op ien van die laegies ston mit sierlike letters: Vrouwkje Menger. Dat scheut me vandaege weer in de zin. Dat was nog een tied dat de maegies breiden, mazen, berduren en verstokken leerden. Klompen wodden kramd en kepotte pannen kwam een stoppe in. Now wodt alles wat kepot is votgooid. Dat zal op ‘e duur ongetwiefeld een doodlopende weg blieken te wezen. We zitten op aandere gebieden ok op doodlopende wegen, mar veurdat meensken dat begriepen willen moet et waeter oons eerst tot de lippen staon. En dan is et lichtkaans al te laete.

Ik hebbe vandemorgen een stok naokeken da’k gister schreven hebbe veur et Stellingwarver tiedschrift De Ovend. Een artikel over et feit dat d’r now Stellingwarfs komt te staon, een verhael van mi’j, in et Kedoboek van de Friese Boekeweke. De zes schrievers die vraogd binnen om een verhael veur dat boek te schrieven weren in wezen twiede keuze. Netuurlik is d’r eerst een Friese schriever vraogd om dat klussien  te doen, zoas aanders ok. Mar disse schriever was een betien slim ondeugend. Hi’j leut AI et wark doen. Dat wodde ontdekt en ja, doe mos d’r in zeuven haosten wat aanders verzunnen wodden. Hoe zit dat mit Stellingwarver schrievers? De verhaelen, gedichten en artikels die in De Ovend staon, bin die allegeer nog echt of soms veur een pat ok al maekt deur AI? Let de redaktie van De Ovend wel op zoks?