Op vesite

Ze zeggen daj’ gien twie dingen toegelieke doen kunnen, mar ik hebbe et gisteraovend toch daon. Ik hebbe naor de prachtige film The Interpreter keken. Die ha’k al wel es vaeker zien, mar ik hebbe d’r weer van geneuten. Prachtig spel van Nicole Kidman en Sean Penn. Fantastisch hoe as die op mekeer reageerden. Et slot van de film is ok zo mooi. Ik hadde wel graeg wild da’k zo mooi akteren kund hadde. Onder de film he’k twie keer ok even op mien tillefoon de shorttrack-finales zien die oons twie keer goold opleverd hebben. Hiel mooi!

Vandaege was et op vri’jdag de dattiende een drokke dag. Ik hebbe vandemorgen naor fysiosport in Wolvege west en vandemiddag he’k, ok in Wolvege, op vesite west bi’j Reindert en Tjitske. Dat hadde al lange es zuld. Reindert warkte vroeger ok op ‘e belastinginspektie in Et Vene. Et was hiel genoeglik, dat de mond het oons vandemiddag gien ogenblik stillestaon.

Ik maekte gister een fout in mien dagboekstokkien over Cees Nooteboom, alhoewel gieniene me d’r over bericht het. Ik schreef de naeme van de Griekse dichter verkeerd. Ik verwisselde de letters v en f en zette gien strepien op ‘e laeste a in de naeme. Hier dan zoas et wezen moet en dan hielemaole volledig. Konstantinos Petros Kaváfis (1863-1933). Cees Nooteboom schreef me indertied dat hi’j et gedicht van Kaváfis in een Stellingwarver vertaeling ok prachtig vun. Die vertaeling wodde indertied maekt deur Harmen Houtman. Haarm het doe neffens mi’j gebruuk maekt van de vertaeling in et Nederlaans deur Hans Warren. Haarm het doe ok kontakt mit Hans Warren had. Die schrift daor temeensen over in ien van zien dielen van Geheim Dagboek. Tsja… Kaváfis, Harmen Houtman, Hans Warren, Johan Veenstra en Cees Nooteboom. Hier zol eins wel een mooi verhael veur De Ovend inzitten.