Op slag van twaalf
Plaetst op 7 november 2025.
Vandemorgen he’k op ‘e fiets naor Wolvege west veur fysiosport. Et is nog altied heerlik fietsweer. Naoda’k me in et zwiet vrot hadde, he’k bi’j Jarmo, die honderd meter veerderop zit mit zien komputerservice, een peer bakkies drinken had.
Ik hebbe de verhaelebundel Op slag van twaalf van Sape Zwama lezen. Et is een bundel mit 27 verhaelen in et Westerkertiers. Dat is et Grunnings dat slim op et Stellingwarfs liekt. Et boek is uutgeven in 1996 en was doe et 23ste begeunstigersboek van de Stichting ’t Grunneger Bouk. Sape Zwama wodde in 1911 geboren in Kommerziel en begon eerst op zien zeuventigste mit de schrieveri’je in ’t Westerkertiers. Hi’j publiseerde verhaelen in de tiedschriften Krödde en Toal en Taiken. In 1988 verscheen zien streekroman Toen t Polderdiepke dicht lag. Ik hebbe de verhaelen in disse bundel mit genoegen lezen. Et is mooi om boeken in verschillende streektaelen te lezen.
