Op petret

Vandemorgen kwam fotografe Ingrid Sweers uut Ruurlo hier om me op petret te zetten veur bi’j et interview in Landleven. Ze hoefde trouwens niet hielemaole uut Ruurlo te kommen, mar uut Heeg daor ze een weke op vekaansie is. Ze praotte Aachterhoeks en ik Stellingwarfs. We hebben eerst gezellig even theedronken en poes is aaid. De foto’s mossen buten neumen wodden op een idyllisch plakkien. Dat was de veurweerde. Omdat et artikel in een winternommer van Landleven komt, mochten d’r gien bomen mit blad op kommen en ik mos dikke winterkleren an. Dat laeste was gien perbleem.We bin uuteindelik naor de Kuundersluus in Ooldehoorn reden. Daor bin ik hiel vaeke op petret kommen op ‘e Stellingwarver kaant van de Kuunder. Ik hope dat d’r een goeien iene tussen zit waor a’k ok nog een betien netties en veurdielig op stao.

Vandemiddag he’k bi’j Frits in et ziekenhuus keken. Ik moch zomar et parkeerterrein op rieden, zonder da’k argens een kaortien uuttrekken mos. Ik maekte me al zorgen da’k et parkeerterrein nao et bezuuk misschien niet meer ofkommen kon. Mar… alles was vandaege gratis omdat d’r een storing was. We hebben genoeglik een goed ure praot. Aj’ 82 binnen en dan een opperaosie van 12 uren ondergaon moeten en 5 liter bloed d’r bi’j hebben moeten, dan is et wel dudelik daj’ drekt gien haeze meer an lopen. Et moet staorigan weer wat opknappen.