Johan Veenstra
Stellingwarver schriever en verteller
Plaetst op 11 juli 2023.
Vandemorgen scheut et me in de zin dat et gister 60 jaor leden was da’k slaegde veur et ulo-examen. En doe mos ik in 1963 votdaolik an ’t wark, want d’r mos geld verdiend wodden en ik mos kostgeld betaelen. We hadden et krap. Zestig jaor… Ik zol ze niet graeg weer overdoen willen. Now ja, zoe’n dag as vandaege vanzels wel. Et was een heerlike ontspannen dag. We bin mit de boot et waeter op west van 10 ure vandemorgen tot kwat over 6 vandemiddag. We bin deur Wartena veerd en we legden nao een protte omwegen om half 3 an bi’j hotel-resteraant Ie-Sicht. Daor hewwe goed een ure op et terras zeten en we hebben d’r lekker eten en drinken had. Vervolgens veerden we via Eernewoolde in de richting van de Fonejacht-brogge. Dat is een brogge over et Preenses Margrietkenaal in de vierbaensweg naor Drachten. Nao de boottocht bin ‘k naor Tjerkje in Liwwadden reden. Die hadde mien ni’je boek Naozoemerlaand besteld en dat he’k heur brocht. Ik hebbe bi’j heur wat drinken had en we hebben genoeglik bi’jpraot. Rosco, de hond, was nog lieke waeks as altied. In mien thriller Et liek in de Lende woont pelisievrouw Anja Winters, die stiekem gek op rechercher Rik Smit is, in et huus van Tjerkje in Liwwadden. Hieronder een foto die ‘k vandemorgen maekt hebbe. Hier veren we deur et mooie Wartena.