Op et Lauwersmeer

Vandemiddag he’k mit Fettje een prachtige boottocht maekt op et Lauwersmeer mit de boot Vlinderbalg. D’r kon an boord gaon wodden in Oostmahorn/Esonstad en tegenover et resteraant van vekaansiepark Suyderoog. Dat hebben wi’j daon. Daor hebben Jelle en ik al es een midweke in een husien zeten en we hebben doe mit dezelde boot et waeter op west. Et was dus bekend terrein. We bin om kwat over twieje an boord gaon. De boot was vol. We hebben een tocht van twienenhalf ure maekt. De stuurman vertelde een protte onderweg. We hebben lekker op et dek zeten en we hadden d’r van alles bi’jboekt. Op die meniere kregen we twie keer een bakkien thee mit bi’j et eerste koppien een lekker stok gebak. En vervolgens nog een draankien en een schaoltien mit koolde happies en laeter nog een schaoltien mit waarme happies. Et was allemaole dikke veur mekaander. Om kwat veur vufe biwwe weer van boord gaon. We hebben zokrek eten op et terras van resteraant Hof van Oldeberkoop in et centrum van et dörp. We hadden bakte zalm mit asperges, eerpelties, rebarber en wat gruunvoer. Et was echt superlekker! Daor gaon we vaeker henne! Hieronder nog twie foto’s. Boven: mit disse boot biwwe et Lauwersmeer op west. Onder: we weren mit dit mooie weer niet as ienigsten op et waeter. D’r veerden een protte boten.