Op ‘e grote, stille heide

Ik hebbe vandemorgen eerst naor de dokter west en daor hebben ze me de oren weer es een keer uutspuit. Doe ‘k weer thuus was, hewwe de fietsen aachter op ‘e auto zet. Eregister een boottocht, vandaege een fietstocht. We bin naor Dwingel reden veur oonze jaorlikse fietstocht over et Dwingelderveld. We hebben et daor nog nooit zo waarm had. De temperetuur leup op naor 29 graoden. Op et terras van theehuus Anser Dennen hewwe wat drinken en een hiempe gebak had. Zoe’n grote hiempe dawwe vanaovend niet meer argens eten hebben. De heide kwam prachtig in de bluui. Mar wat moe’n dat vroeger prachtige paorse vlakten west hebben. Now wodt de heide almar meer verdrongen deur benteboel omdat d’r vusen te vule stikstof in de netuur zit. Die rotzooi is slim schaedelik veur de netuur en dus ok veur oons. Wi’j bin ok een stokkien van de netuur, mar dat vergeten de meensken al of niet mit opzet te vaeke. Aanders zaggen we altied twie schaopskudden. Die weren d’r now niet. Zol et te waarm west hebben? Et zol best es zo wezen kunnen dat ze as et zo hiete is niet mit de schaopen de heide opgaon. De wolven zullen ze toch niet allemaole opeten hebben? We kwammen bi’j kneuppuntbodden drie keer dezelde meensken tegen. Bi’j de twiede keer he’k zegd dawwe van de Geheime Dienst weren en heur in de gaten hullen. Bi’j et dadde bod zee de man dat ze terroristen weren en de fietstassen vol explosieven hadden. Ik hebbe doe zegd dat ze oppakt wodden zollen en dan in et Pieter Baan Centrum terechtekommen zollen omdat allienig gekken mit fietstassen vol explosieven bi’j de diek binnen. En zo vermaeken we oons onderweg wat. Hieronder nog twie foto’s. Ik kon gien schaopen op ‘e foto zetten, mar disse mooie koenen wollen ok wel op petret