Op ‘e fiets vot

Vandemorgen bin ‘k om kwat over negen op ‘e fiets stapt en naor Wolvege gaon veur fysiosport. Dat was wel weer neudig, want ik hebbe weer zere spieren. Daornao bin ‘k naor kapster Bertha in Et Vene fietst. Et was prachtig fietsweer. Bi’j Bertha he’k votdaolik een koppien thee en een plakkien bolle mit geitekeze had. Vervolgens het ze meer as een ure mit me doende west om me weer wat toonber te maeken. Daornao he’k een koppien tomatesoep en een uutsmieter had en doe nog een koppien thee mit een peer sukelaogies. Deur de bossen van Et Woold en de Mildamster Poolder bin ‘k weerommereden naor huus toe. Ik kwam in een schoon huus terechte, want Anke hadde de boel intied schonemaekt. D’r was ok een hiele mooie mail kommen van een slim bekende Fries betreffende mien kollum over de FNP en et populisme. Hieronder de beloofde foto van de vesite van oonze burgemeester Stieneke van der Graaf an mi’j. We staon d’r tegere mar mooi op. Ze mailde me dat ze gisteraovend al twie verhaelen uut mien bundel Naozoemerlaand mit plezier lezen hadde. Dat is mooi!