Op ‘e fiets naor Iegypte

Ik hebbe vandaege een superlekkere fietstocht van 46 kilemeter maekt. Ik bin eerst veur een pat bi’j de Kuunder langes naor de sluus aachter Ni’jberkoop fietst en doe deur de prachtige buurtschop Iegypte. Wat is et daor mooi. Ik hadde d’r nog nooit fietst mar wel over schreven. In mien thriller Et liek in de Lende wodt Jurjen daor dood in et zwembad bi’j zien vekaansiehuus vunnen. Hi’j is vermoord… Ik gaf een protte om Jurjen, mar hebbe him toch bewust doodmaeken laoten. As schriever moe’n gevulens van sympathie et soms verliezen van et belang van et spannende verhael. Et is niet aanders. Ik bin bi’j de Prikkedam langes naor Twietel gaon en doe over de prachtige weg van Twietel naor Tronde. Wat een mooi weggien! Van Tronde bin ‘k naor Else gaon en daor he’k op et terras van ’t Anker een bakkien drinken en een boltien mit waarme bienschinke had. Ik bin doe op Boekelte an fietst en vervolgens deur Riesberkaampen. Over een fietspad bin ‘k naor Buil gaon en doe via De Oosterstreek en Noordwoolde over et Meuleboersterpattien naor De Hoeve. En doe over et witte broggien over de Lende weer naor huus toe. Hieronder een foto die ‘k vandemiddag maekt hebbe van de karke uut 1641 en de klokkestoel van Buil. Ik kreeg ok een foto appt van Douwe en Romkje die op et ogenblik op vekaansie in Schotlaand binnen. Ok een oold karkien. Die foto staot ok hieronder. Now ja, Iegypte is vanzels vule veerder vot as Schotlaand! Ik winne et dikke van heur!