Op ‘e daghure

Ik bin vandaege op ‘e daghure west bi’j komputerservice Hofma in Wolvege. Krek as vleden jaor he’k Jarmo daor hulpen om de veurraod op te nemen. Et is algemien bekend da’k niet al te vule kan. Now ja, wat schrieven en vertellen in et Stellingwarfs, mar daor is zo staorigan almar minder belangstelling veur. Op technisch gebied bin ik een nul. Ik vun et dus al slimme biezunder da’k him dit jaor ok weer helpen moch. Ik krieg dan een wonderlik apperaot in de haand en dat ding hool ik veur een kode op een artikel dat te koop is. Ik drokke dan op een knoppien en dan piept dat ding. Vervolgens roep ik hoevule exemplaoren van dat artikel dat ik krek scand hebbe nog in de stelling of et rek staon. En Jarmo warkt zoks dan bi’j in een komputer. Bliekber he’k et d’r toch wel aorig goed ofbrocht, want hi’j het me nao ofloop trakteerd op een lunch in sjefeursresteraant De Stoof. Ik bin daor zowat kiend an huus, want vleden weke donderdag wa’k daor ok al. Vandaege he’k daor twie plakken bolle mit een joekel van een superlekkere gehakballe had. Ie kriegen daor een heerlik bod eten veur niet al te vule centen. En now mar zien a’k ankem jaor weer vraogd wor.