Op de kat af

Wat bin d’r toch een protte boeken over poezen schreven! Ik hebbe d’r de laeste tied krek twieje lezen. Eerstens Poezen in poëzie van Maria Klawer. Die het een hiele protte gedichten bi’j mekeer gadderd die over poezen gaon. Poëzie van hatstikke bekende dichters van vroeger en now. Een peer naemen: Simon Vestdijk, Leo Vroman, Annie M.G. Schmidt, Willem Wilmink, Drs. P, Hugo Claus en nog een hieleboel meer. Twiedens he’k et slim vermaekelike boek Op de kat af van Dorinde van Oort lezen. Et bin interviews mit veurnaeme poezen. Oftewel de poezen van bekende Nederlaanders zoas Paul de Leeuw, J.J. Voskuil, Peter van Straaten, Winnie Sorgdrager, Willem Wilmink, Rudi Fuchs en ok nog een hieleboel meer. Dat zo’k trouwens ok wel es veur et Stellingwarver tiedschrift De Ovend doen kunnen. De katte van de schriever Johan Veenstra interviewen of de buurkatten van Harmen Houtman en Jacob Jellema in Et  Vene. Wat die katten dus van heur vienen… Dat kun wel es slim onthullende interviews wodden! Hieronder een foto die me toestuurd wodde deur Johan en Gertie uut Almelo. Dit is ien van heur buurkatten.