OOVH

Nao et Nedersaksisch Symposium op vri’jdagmiddag in Berkoop moch ik aovens nog naor Et Vene om verhaelen te vertellen in de grote zael van Hof van de Koning veur de leden van de OOVH oftewel de Onafhankelijke Ouderen Vereniging Heerenveen e.o. D’r weren meer as honderd meensken en ok tal van meensken die ‘k wel kenne. De verieninge beston tien jaor en dat wodde groots vierd mit meziek en mit twie manluden die vertellen mochten. Ik vun et biezunder plezierig dat ik daor optreden moch mit Eelke Lok. Die ken ik van Omroep Frieslaand. Van 1989 t/m 1995 vertelde ik mien wekelikse stiekelstokkies veur Omroep Frieslaand op ‘e donderdagmiddag om ongeveer twintig veur iene. Ze kwammen al die jaoren bi’j me thuus om de verhaelties op te nemen. Vervolgens dee ik drie jaor niks veur de radio en doe moch ik kollums vertellen in et live pergramme It Wapen fan Fryslân van Eelke Lok op ‘e vri’jdagaovend. Dat dee ik tegere mit kammeraod Douwe Kootstra. We wisselden mekeer of. Twie jaor laeter dee Mindert Wijnstra ok mit. Mindert is d’r al niet meer. Zo gaot dat. Eelke vertelde vri’jdagaovend over Et Vene en ik dee drie verhaelen uut eigen wark. Et leek me aorig om te beginnen mit et verhael Aktiverend Huisbezoek da’k al wiethoevaeke argens verteld hebbe. Dat verhael staot niet in een boek van me, mar ik hebbe et indertied veur de aldereerste keer in et radiopergramme van Eelke veurlezen in de studio. Vandaege-de-dag zien me mekeer zo now en dan op ‘e bi’jienkomsten van de Alde Friezen, daor we beidend lid van binnen. De kommende zaoterdag is d’r weer zoe’n bi’jienkomst in Jorwerd. Eelke is d’r dan wel, mar ik hebbe aandere verplichtings.