Oosterwoolde

Vandaege he’k in klad een kollum schreven veur de kraante. A’k wat roemer in de tied zitte, za’k et stokkien verbeteren en bi’jfieken gaon. Et is een betien drok en dat blift et veurlopig ok… Ik hebbe krek een net verstruperspakkien  antrokken, want ik zal vanaovend vot te vertellen. Dat is (haost) altied mooi om te doen. Om zeuven ure vanaovend moe’k al in De Miente in Oosterwoolde wezen. Ik mag daor optreden veur de leden van Vrouwen van Nu. Die hietten vroeger plattelaansvrouwluden. Ik bin in et verleden al meerdere keren bi’j heur west te vertellen. De laeste keer was in 2011, dat is dus al een jaormennig leden. Ik hebbe de laeste daegen mien verhaelen en gedichten goed rippeteerd, dat ik hope mar dat et d’r vanaovend een betien goed uutroegelt. Hieronder nog een foto van gister, want ik kan d’r niet genoeg van kriegen. Al die prachtige bloemen… Disse foto he’k ok maekt in de Pooldertuun in Anna Paulowna.